ஹெல்மெட் அணியாமல் பைக்கில் சென்ற வாலிபர்.. இன்ப அதிர்ச்சியளித்த பொலிசார்: தீயாக பரவும் வீடியோ

ஆந்திராவில் ஹெல்மெட் அணியாமல் பைக்கில் சென்ற வாலிபருக்கு போக்குவரத்து பொலிசார் ஒருவர் இன்ப அதிர்ச்சியளித்த வீடியோ இணையத்தில் தீயாக பரவி வருகிறது.
கரிம்நகர் மாவட்டத்துக்கு உட்பட்ட தேசிய நெடுஞ்சாலையில் வழக்கம்போல், சோதனைச் சாவடி அமைத்து பொலிசார் வாகனங்களை சோதனையிட்டுள்ளனர்.

இது தொடர்பான வீடியோவில், அந்த வழியாக இருசக்கர வாகனத்தில் ஒரு வாலிபர் வேகமாக வருகிறார்.

அவரை தடுத்து நிறுத்தும் பொலிசார் அந்த வாலிபரின் ஓட்டுனர் உரிமம், வாகனம் சார்ந்த பிற சான்றிதழ்கள் அனைத்தையும் ஆய்வு செய்கின்றார்.

இதையடுத்து அந்த வாலிபரிடம், 'ஹெல்மெட் எங்கே..?' என்று கேட்கின்றார்.

அதற்கு அந்த வாலிபர் அளித்த சமாதானத்தை பொலிசார் ஏற்காத நிலையில், பணத்தை லஞ்சமாக தருகிறார்.

பணத்தை பெற்றுக்கொண்ட இன்ஸ்பெக்டர், அந்த வாலிபரின் வாகனத்தை பூட்டி, சாவியை அங்கிருக்கும் ஒரு காவலரிடம் ஒப்படைத்து விட்டு தனது பைக்கை எடுத்து கொண்டு செல்கிறார்.

இதனால் அதிர்ச்சியடைந்த அந்த வாலிபர், செய்வதறியாது திகைத்து நிற்கிறார்.

பின்னர் சிறிது நேரத்தில் சம்பவ இடத்துக்கு வரும் அந்த இன்ஸ்பெக்டர், கையில் ஒரு அட்டை பெட்டியுடன் அந்த வாலிபரை நெருங்குகிறார்.

அந்த பெட்டிக்குள் இருக்கும் புத்தம்புதிய ஹெல்மெட்டை அந்த வாலிபரின் தலையில் பொருத்திவிட்டு, ஹெல்மெட் வாங்கிய பில்லை அவரிடம் அளிக்கிறார்.

ரகசிய கண்காணிப்பு கமெராவில் பதிவாகியுள்ள இந்த வீடியோ பதிவை இதுவரை சுமார் 2 லட்சம் பேர் பார்த்துள்ளது குறிப்பிடத்தக்கது.