சட்டவிரோதமாக செல்ல முயன்ற 65 பேரைத் திருப்பியனுப்பியது அவுஸ்திரேலியா

சட்டவிரோத கடற்பயணத்தின் ஊடாக அவுஸ்திரேலியாவிற்குள் நுழைய முயற்சித்த இலங்கையர்கள் உள்ளிட்ட அகதிகள் குழுவொன்றை அவுஸ்திரேலிய அரசாங்கம் இந்தோனேசியாவிற்கு திருப்பி அனுப்பி வைத்துள்ளது.
இச்சம்பவம் கடந்த 26ம் திகதி இடம்பெற்றுள்ளதாக இந்தோனேசிய காவற்துறை தலைமை அதிகாரி தெரிவித்துள்ளார்.

4 பெண்கள் உள்ளிட்ட 65 அகதிகள் இவ்வாறு இந்தோனேிசியாவுக்கு திருப்பியனுப்பப்பட்டுள்ளனர்.

இவர்களில் 54 இலங்கையர்களும், 10 பங்களாதேஷத்தவர்களும், மியன்மாரை சேர்ந்த ஒரு அகதியும் இருந்துள்ளதாக தெரிவிக்கப்படுகின்றது.

அவுஸ்திரேலிய அதிகாரிகள் அகதிகளுக்கு உணவு மற்றும் குடிப்பானங்களை வழங்கி அவர்கள் இந்தோனேசிய கடலுக்கு செல்லும் அளவுக்கான எரிபொருளையும் படகுக்கு வழங்கியுள்ளனர்.

அத்துடன் அகதிகளில் அடங்கியிருந்த கர்ப்பிணி பெண் வைத்தியசாலையில் அனுமதிக்கப்பட்டு சுகமாக உள்ளதாக இந்தோனேசிய பொலிஸ் தலைமையதிகாரி குறிப்பிட்டுள்ளார்

இரு கப்பல்களில் இவர்கள் அவுஸ்திரேலியா செல்ல முற்பட்ட வேளையில் இரு கப்பல்களும் விபத்துக்குள்ளகியுள்ளதாக சுட்டிக்காட்டப்பட்டுள்ளது.

எப்படியிருப்பினும் தற்போது இந்த அகதிகள் இந்தோனேசியா தீவில் தங்கியிருப்பதாக தெரிவிக்கப்படுகின்றது.

இந்நிலையில் இவர்கள் தற்போது இந்தோனேசிய தடுப்புமுகாம் ஒன்றில் தடுத்துவைக்கப்பட்டுள்ளதுடன், படகோட்டிகள் என நம்பப்படும் நால்வர் இந்தோனேசிய அதிகாரிகளால் கைதுசெய்யப்பட்டுள்ளனர்