12ம் வகுப்பு பொதுத்தேர்வில் மகனை முந்தி சாதனை படைத்த தாய்

அஸ்ஸாமில் 12ம் வகுப்பு பொதுத்தேர்வு எழுதிய 37 வயது பெண்மணி ஒருவர், தனது மகனை விட அதிக மதிப்பெண்கள் பெற்று சாதனை படைத்துள்ளார்.
திப்ருகர் மாவட்டத்தில் உள்ள திகோவ்கினார் சாங்மைகாவ்ன் கிராமத்தைச் சேர்ந்த நயன்மோனி பெஸ்பருவாவின் கணவர் காய்கறி விற்பனை செய்து வருகிறார்.

நயன்மோனிக்கு 3 மகன்கள் மற்றும் ஒரு மகள் உள்ளனர். படிப்பில் ஆர்வம் கொண்ட நயன்மோனிக்கு திருமண வடிவில் கல்வி கற்கத் தடை வந்ததால் பள்ளி படிப்பை பாதியிலேயே நிறுத்தியுள்ளார்.

தற்போது இவருடைய மூத்த மகன் ஆங்கூர், 12ம் வகுப்பு படித்து வந்த நிலையில், நயன்மோனிக்கு மீண்டும் படிக்க ஆர்வம் வந்தது, இதற்கு அவரது கணவரும் தடை சொல்லவில்லை.

இதையடுத்து தினமும் காலை 4 மணிக்கு எழுந்த நயன்மோனி வீட்டு வேலைகளை முடித்துவிட்டு தினமும் 12 கி.மீ. சைக்கிளில் சென்று பெண்கள் மேல்நிலைப்பள்ளிக்கு சென்று படித்து வந்தார்.

தாயும், மகனும் 12ம் வகுப்பு தேர்வினை ஒன்றாக எழுத முடிவு செய்ததையடுத்து, இருவரும் ஒன்றாக படித்தனர்.

தற்போது தேர்வு முடிவுகள் வெளியான நிலையில், நயன்மோனி 69.8 சதவீத மதிப்பெண்கள் பெற்று முதல் வகுப்பில் தேர்ச்சி பெற்றுள்ளார்.

ஆனால் அவரது மகன் தேர்ச்சி பெறும் அளவுக்கு மட்டுமே மதிப்பெண்கள் பெற்றுள்ளார்.

தான் நல்ல மதிப்பெண்கள் பெற்றபோதிலும் மகன் குறைவாக மதிப்பெண்கள் பெற்றுள்ளதை நினைத்து நயன்மோனி கவலையில் உள்ளார்.

மேலும், இவர் கடந்த 2013ம் ஆண்டு தனது மகனுடன் சேர்ந்து எஸ்.எஸ்.எல்.சி. தேர்வை எழுதி, இருவரும் 2ம் வகுப்பில் தேர்ச்சி பெற்றனர் என்பது குறிப்பிடத்தக்கது.