இட்லி மிளகாய்ப் பொடி

சிவப்பு மிளகாய் - ஒரு கப்
தோலுடன் கூடிய உளுத்தம் பருப்பு - அரை கப்
கட்டி பெருங்காயம் - ஒரு சிறு துண்டு (அ) பெருங்காயப் பொடி - அரை தேக்கரண்டி
பூண்டு - 12 பற்கள்
நல்லெண்ணெய் - 2 மேசைக்கரண்டி
கறிவேப்பிலை - ஒரு கொத்து
உப்பு - ஒரு மேசைக்கரண்டி



தேவையான பொருட்களைத் தயாராக எடுத்து வைக்கவும்.


அடுப்பில் வாணலியை வைத்து எண்ணெய் ஊற்றி, காய்ந்ததும் கட்டி பெருங்காயத்தைப் பொரித்தெடுத்து மிக்ஸியில் போட்டு பொடி செய்து கொள்ளவும். அதே வாணலியில் மேலும் சிறிது எண்ணெய் ஊற்றி உளுத்தம் பருப்பைப் போட்டு நன்றாக வாசம் வரும் வரை சிவக்க வறுத்தெடுத்து தட்டில் கொட்டி ஆறவிடவும்.


வாணலியில் ஒரு கரண்டி எண்ணெய் ஊற்றி, மிளகாயைப் போட்டு வறுக்கவும். (மிளகாய் லேசாக நிறம் மாறும் வரை வறுத்தால் போதும்).


வெறும் வாணலியில் கறிவேப்பிலையைப் போட்டு மொறுமொறுப்பாக வறுத்துக் கொள்ளவும். பூண்டுப் பற்களை தோல் நீக்கி வைக்கவும்.


உளுத்தம் பருப்பு ஆறியதும், அத்துடன் பொடி செய்த பெருங்காயத்தைச் சேர்த்து மிக்ஸியில் போட்டு நன்றாகத் திரித்தெடுத்து அகலமான பாத்திரத்தில் மாற்றி வைக்கவும்.


பிறகு மிளகாயுடன் உப்பு சேர்த்து மிக்ஸியில் போட்டு நன்றாகத் திரிக்கவும்.


இதில் முக்கால் வாசி பொடியை திரித்து வைத்திருக்கும் உளுந்துப் பொடியுடன் சேர்த்து விட்டு, மீதியுள்ள மிளகாய்ப் பொடியுடன் பூண்டு மற்றும் கறிவேப்பிலை சேர்த்து நன்றாகத் திரிக்கவும். இது சற்று ஈரப் பதமாக இருக்கும். (பூண்டின் ஈரப்பதம் இருக்கும்).


பிறகு உளுந்துப் பொடி, மிளகாய்ப் பொடி, பூண்டுப் பொடி அனைத்தையும் பக்குவமாக, சிறிது சிறிதாக நன்றாகக் கலந்து திரிக்கவும்.


சுவையான இட்லி / தோசை மிளகாய்ப் பொடி தயார்.