மகிந்த ஆதரவாளர்களை களையெடுக்கும் மைத்திரி

ஸ்ரீலங்கா சுதந்திரக் கட்சியில் இருக்கும் முன்னாள் ஜனாதிபதி மகிந்த ராஜபக்ச ஆதரவாளர்களை களையெடுக்கும் நடவடிக்கைகளை ஜனாதிபதி மைத்திரிபால சிறிசேன ஆரம்பித்துள்ளதாக அரசியல் வட்டார தகவல்கள் தெரிவிக்கின்றன.
இதனடிப்படையில் ஸ்ரீலங்கா சுதந்திரக் கட்சியின் மாவட்ட அமைப்பாளர் பதவிகள் சிலவற்றில் உடனடியான மாற்றங்களை செய்ய, அந்த கட்சியின் தலைவரான ஜனாதிபதி மைத்திரிபால சிறிசேன தீர்மானித்துள்ளதாக கட்சியின் உட்தரப்பு வட்டாரங்கள் கூறுகின்றன.

எதிர்வரும் பொதுத் தேர்தலை இலக்கு வைத்து குருணாகல், நுவரெலியா, அனுராதபுரம் ஆகிய மாவட்ட அமைப்பாளர்கள் பதவியில் மாற்றங்கள் செய்யப்பட உள்ளன.

அதேவேளை முன்னாள் ஜனாதிபதி மகிந்த ராஜபக்சவின் பிரபல ஆதரவாளர்கள், அமைப்பாளர்களாக இருக்கும் தொகுதிகளின் அமைப்பாளர்களாக ஜனாதிபதி மைத்திரிபால சிறிசேன தனக்கு ஆதரவானவர்களை நியமிக்க உள்ளதாக தெரியவருகிறது.

அடுத்த வாரத்திற்குள் ஸ்ரீலங்கா சுதந்திரக் கட்சியின் நிறைவேற்றுச் சபையை கூட்டி இந்த நியமனங்கள் தொடர்பான அனுமதிகளை பெற திட்டமிட்டப்பட்டுள்ளது.