சர்வதேச அளவில் செல்வாக்கு மிக்க 100 பெண்கள் பட்டியலில் 4 இந்தியர்கள்

பிரபல போர்ப்ஸ் பத்திரிகை வெளியிட்ட செல்வாக்கு மிக்க 100 பெண்கள் பட்டியலில் நான்கு இந்தியர்கள் இடம்பிடித்துள்ளனர்.
சர்வதேச அளவில் அரசியல், தொழில் துறை, சமூக சேவை உள்ளிட்ட பிரிவுகளில் செல்வாக்கு மிக்க 100 பெண்களின் பட்டியலை போர்ப்ஸ் பத்திரிகை வெளியிட்டுள்ளது.

அந்த பட்டியலில், எஸ்.பி.ஐ வங்கியின் தலைவர் அருந்ததி பட்டாச்சார்யா, ஐசிஐசிஐ வங்கியின் சாந்தா கொச்சார், பயோகான் நிறுவனத்தின் தலைவர் கிரண் மஜூம்தார் ஷா மற்றும் ஹெச்டி மீடியாவின் தலைவர் ஷோபனா பாட்டியா ஆகியோர் இடம் பிடித்துள்ளனர்.

59 வயதாகும் அருந்ததி பட்டாச்சார்யா இந்த பட்டியலில் 30வது இடத்தில் இருக்கிறார். இவர் கடந்த வருடம் இவர் 36வது இடத்தில் இருந்தார்.

சாந்தா கொச்சார் 35வது இடத்திலும், கிரண் மஜூம்தார் ஷா 85வது இடத்திலும், புதிதாக பட்டியலில் நுழைந்திருக்கும் ஷோபனா பாட்டியா 93வது இடத்திலும் இருக்கின்றனர்.

இந்த பட்டியலில் ஜேர்மன் பிரதமர் ஏஞ்சலா மெர்கெல் முதல் இடத்தை பிடித்துள்ளார்.

இந்திய வம்சாவளி பெண்களான இந்திரா நூயி மற்றும் பத்மஸ்ரீ வாரியர் ஆகியோரும் இடம் பிடித்துள்ளனர்.

பெப்சிகோ நிறுவனத்தின் தலைவர் இந்திரா நூயி இந்த பட்டியல் ஆரம்பிக்கப்பட்ட வருடத்தில் இருந்து ஒவ்வொரு வருடமும் இந்த பட்டியலில் இடம் பெறுகிறார்.

சிஸ்கோ நிறுவனத்தின் தலைமை தொழில்நுட்ப அலுவலர் பத்மஸ்ரீ வாரியர், கடந்த வருடம் 71வது இடத்தில் இருந்து தற்போது 84வது இடத்துக்கு சரிந்திருக்கிறார்.

மேலும், இந்த பட்டியலில் அதிகபட்சமாக 59 அமெரிக்கர்கள் இடம்பிடித்துள்ளனர் என்பது குறிப்பிடத்தக்கது.