வெந்தய மாங்காய்

மாங்காய் - அரை கிலோ
மிளகாய் வற்றல் - 100 கிராம்
வெந்தயம் - 25 கிராம்
கடுகு - 25 கிராம்
பெருங்காயத் துண்டு - சிறு கோலி குண்டு அளவு
உப்பு - 2 மேசைக்கரண்டி+ஒரு தேக்கரண்டி
நல்லெண்ணெய் - 200 மில்லி



மிளகாய் வற்றலை காம்பை கிள்ளி விட்டு எடுத்துக் கொள்ளவும். பெருங்காயத்தை துண்டுகளாக உடைத்துக் கொள்ளவும். மற்ற தேவையான அனைத்து பொருட்களையும் தயாராக எடுத்து வைத்துக் கொள்ளவும்.


மிக்ஸியில் மிளகாய் வற்றல், வெந்தயம், கடுகு, உப்பு, பெருங்காயத் துண்டு ஆகியவற்றை போட்டு பொடி செய்து எடுத்துக் கொள்ளவும்.


மாங்காயை நன்றாக தண்ணீரில் கழுவி விட்டு தண்ணீர் இல்லாமல் சுத்தமாக துடைத்து விட்டு ஒரு மாங்காயை நான்கு துண்டுகளாக போடவும். அதைப் போல எல்லா மாங்காவையும் துண்டுகளாக நறுக்கிக் கொள்ளவும்.


அதன் பிறகு ஒரு ப்ளாஸ்டிக் வாளி அல்லது கண்ணாடி பாத்திரத்தில் நறுக்கின மாங்காய் துண்டுகளை போட்டு அதில் நுணுக்கி எடுத்து வைத்திருக்கும் பொடியை போடவும்.


பின்னர் அதில் 200 மில்லி அளவு நல்லெண்ணெயை பரவலாக ஊற்றி விடவும். நல்லெண்ணெய் ஊற்றி செய்வதால் அதிக நாட்கள் மாங்காய் கெடாமல் இருக்கும்.


பிறகு பொடி மற்றும் நல்லெண்ணெய் சேர்த்ததும், வாளியை கையில் எடுத்துக் கொண்டு எல்லாம் ஒன்றாக சேரும்படி அடியிலிருந்து குலுக்கி விடவும். கரண்டியை வைத்து மாங்காவை கிளறக் கூடாது.


அந்த வாளியை நன்கு இறுக்கமான ஒரு மூடியை வைத்து மூடி விடவும். தண்ணீர் படாமல் வைத்துக் கொள்ளவும். ஒரு நாளைக்கு மூன்று முறை எடுத்து குலுக்கி விடவேண்டும். 7 நாட்கள் கழித்து உபயோகப்படுத்தலாம். ஊற ஊற தான் வெந்தய மாங்காய் ருசியாக இருக்கும்.


காரசாரமான வெந்தய மாங்காய் ரெடி.