ஜெயலலிதா முதல்வராக பதவியேற்க கூடாது: தே.மு.தி.க-வின் நோட்டீஸால் பரபரப்பு

ஜெயலலிதாவுக்கு முதல்வராக பதவியேற்பு செய்து வைக்கக் கூடாது என்று தே.மு.தி.க.வைச் சேர்ந்த வழக்கறிஞர் ஜி.எஸ். மணி என்பவர் அனுப்பிய நோட்டீஸ் பரபரப்பை ஏற்படுத்தியுள்ளது.
சொத்துக் குவிப்பு வழக்கில் கர்நாடகா உயர்நீதிமன்ற தனி பெஞ்ச் நீதிபதி குமாரசாமி ஜெயலலிதாவை விடுதலை செய்து தீர்ப்பளித்தார்.

இந்நிலையில் இந்த தீர்ப்பை எதிர்த்து உச்சநீதிமன்றத்தில் மேல்முறையீடு செய்வதற்கு கர்நாடகா அரசு ஆலோசனை நடத்தி வருகிறது.

மேலும், அம்மாநிலத்தில் சிறப்பு அரசு வழக்கறிஞர் ஆச்சார்யா, அரசு தலைமை வழக்கறிஞர் ரவிவர்மா குமார் ஆகியோரும் மேல்முறையீடு செய்ய அரசுக்கு பரிந்துரைத்துள்ளனர்.

இதனிடையே மே 22 திகதி அ.தி.மு.க. எம்.எல்.ஏ.க்கள் கூட்டம் கூட்டப்படுகிறது. இதில் ஜெயலலிதா, சட்டசபை கட்சித் தலைவராக தேர்ந்தெடுக்கப்பட்டு மீண்டும் முதல்வராக பதவியேற்க உள்ளதாக கூறப்படுகிறது.

இந்நிலையில் டெல்லியில் இருந்து தே.மு.தி.க.வைச் சேர்ந்த வழக்கறிஞர் ஜி.எஸ். மணி என்பவர், "ஊழல் வழக்கில் ஜெயலலிதா விடுதலை செய்யப்பட்டதை எதிர்த்து மேல்முறையீடு செய்வது குறித்து கர்நாடகா அரசு ஆலோசனை நடத்தி வருகிறது.

இந்த மேல்முறையீட்டு மனுவைத் தாக்கல் செய்து அதன் தீர்ப்பு வரும் வரை ஜெயலலிதாவுக்கு பதவியேற்பு செய்து வைப்பது சட்டவிரோதமாகும்.

ஜெயலலிதாவுக்கு பதவியேற்பு செய்து வைத்தால் சட்டப்படி நடவடிக்கை மேற்கொள்ளப்படும்" என்று ஆளுநர் ரோசையா, தமிழக அரசின் தலைமைச் செயலர் உள்ளிட்டோருக்கு ஒரு நோட்டீஸ் அனுப்பியுள்ளார்.