ஆசிரியையை கீழே தள்ளி தாக்கிய பொலிசார்: பொதுமக்கள் ஆவேசம்

நாகப்பட்டினத்தில் வாகன சோதனையில் ஈடுபட்ட போக்குவரத்து பொலிசார் ஆசிரியை ஒருவரை கீழே தள்ளியது பெரும் பரபரப்பை ஏற்படுத்தியுள்ளது.
நாகப்பட்டினம் அருகே பொய்கைநல்லூரை சேர்ந்த ராமச்சந்திரனின் மனைவி சர்மிளா (38), நாகையில் உள்ள அரசு பெண்கள் பள்ளியில் ஆசிரியையாக பணிபுரிந்து வருகிறார்.

இவர் நேற்று பணி முடிந்து பைக்கில் சென்றபோது, வாகன சோதனையில் ஈடுபட்டிருந்த போக்குவரத்து பொலிசார் காளிதாஸ் திடீரென சர்மிளாவின் பைக்கை தடுத்து நிறுத்தி, கீழே தள்ளியுள்ளார்.

இந்த சம்பவத்தை கண்ட பொதுமக்கள் பெண்ணை தாக்கியதற்காக பொலிசாரிடம் வாக்குவாதம் செய்ததோடு, அவரை தாக்கவும் செய்துள்ளனர்.

பின்னர் இது குறித்து தகவலறிந்த நாகப்பட்டினம் காவல்துறை ஆய்வாளர் முத்துசாமி, வெளிப்பாளையம் காவல்துறை துணை ஆய்வாளர் ராமலிங்கம் ஆகியோர் சம்பவ இடத்திற்கு விரைந்துள்ளனர்.

அங்கு அவர்கள் இருவரிடமும் சமாதானம் பேசியதோடு, பொது மக்களையும் கலைந்து போகுமாறு கூறியுள்ளனர்.

ஆனால் பொது மக்களில் சிலர், ஆவேசத்துடன் பொலிசாரிடம் வாக்குவாதத்தில் ஈடுபட்டுள்ளனர்.

இதையடுத்து ஆசிரியை சர்மிளா காவல்துறை ஆய்வாளரிடம் இதுகுறித்து புகார் அளித்துள்ளார்.

மேலும், அந்த புகாரின்பேரில் விசாரணை நடத்துவதாகவும் பொலிசார் தெரிவித்துள்ளனர்.