மெக்சிகோவில் ஆட்கடத்தல்காரர்களால் தடுத்து வைக்கப்பட்டிருந்த 5 இலங்கையர் உட்பட 103 பேர் மீட்பு

மெக்சிகோவில் ஆட்கடத்தல்காரர்களால் தடுத்து வைக்கப்பட்டிருந்த 5 இலங்கையர்கள் உள்ளிட்ட 103 பேரை பாதுகாப்பாக மீட்டுள்ளதாக அந்நாட்டு பொலிஸார் தெரிவித்துள்ளனர்.
அமெரிக்காவில் சட்டவிரோதமாக குடியேற முயன்ற 103 பேரே இவ்வாறு ஆட்கடத்தல் கும்பலிடம் சிக்கியுள்ளனர்.

அக்சாபுஸ்கோ என்ற நகரிலேயே இவர்கள் அனைவரும் பணயக் கைதிகளாக தடுத்து வைக்கப்பட்டிருந்தனர். இவர்களில் சில ர் 5 வாரங்களாக தடுத்து வைக்கப்பட்டுள்ளதாக தெரிவிக்கப்படுகிறது.

தடுத்து வைக்கப்பட்டிருந்தவர்களின் உறவினர்களிடம் ஆட்கடத்தல்காரர்கள் பணம் கேட்டு மிரட்டியதாகவும் தெரிவிக்கப்படுகிறது. 103 பேரும் தப்பிச் செல்ல முடியாதவாறு சுற்றிவர மின்சார வேலி அமைக்கப்பட்ட வீடு ஒன்றில் தடுத்து வைக்கப்பட்டிருந்தனர்.

இந்த நிலையில், நேற்று முன்தினம் இரவு நடத்தப்பட்ட திடீர் தேடுதல் நடவடிக்கை ஒன்றில் இவர்கள் அனைவரும் மீட்கப்பட்டுள்ளனர்.

இவர்களைப் பிடித்து வைத்திருந்த ஆட்கடத்தல் கும்பலைச் சேர்ந்த 5 பேரும் மெக்சிகோ பொலிஸாரால் கைது செய்யப்பட்டுள்ளனர்.

14 சிறுவர்கள் உள்ளிட்ட 103 பணயக் கைதிகளையும் மீட்கும் நடவடிக்கையில் 100இற்கும் அதிகமான காவல்துறையினர் ஈடுபட்டதாகத் தெரிவிக்கப்படுகிறது.

மீட்கப்பட்டவர்களில் ஐந்து பேர் இலங்கையர்கள், 23 பேர் இந்தியர்கள் ஏனையவர்கள் மத்திய அமெரிக்க நாடுகளைச் சேர்ந்தவர்கள் என்றும் தகவல்கள் தெரிவிக்கின்றன.