19வது திருத்தச் சட்டத்தை மல்வத்து மாநாயக்கரிடம் கையளித்த ஜனாதிபதி

நாடாளுமன்றத்தில் நாளை விவாதத்திற்கு எடுத்து கொள்ளப்படவுள்ள 19வது அரசியலமைப்புத் திருத்தச் சட்டத்தின் பிரதியொன்றை ஜனாதிபதி மைத்திரிபால சிறிசேன இன்று மல்வத்து மாநாயக்கர் திப்பட்டுவாவே ஸ்ரீ சுமங்கள தேரரிடம் கையளித்துள்ளார்.
மல்வத்து மஹா விகாரையில் இன்று ஞாயிற்றுக்கிழமை காலை மாநாயக்க தேரரை சந்தித்த ஜனாதிபதி குறித்த அரசியலமைப்புத் திருத்தச் சட்டத்தை கையளித்துள்ளார்.

சிறிது நேரம் ஜனாதிபதி, மாநாயக்க தேரருடன் அரசியலமைப்புத் திருத்தச் சட்டம் தொடர்பில் கலந்துரையாடியுள்ளதுடன் மாநாயக்கர், ஜனாதிபதிக்கு ஆசி வழங்கியுள்ளார்.

அதேவேளை மல்வத்து அநுநாயக்கர் நியாங்கொட விஜிதசிறி தேரரை சந்தித்த ஜனாதிபதி, அவரிடம் 19வது திருத்தச்சட்டத்தின் பிரதியொன்றை கையளித்துள்ளார்.

எதிர்க்கட்சித் தலைவர் நிமால் சிறிபால டி சில்வா உள்ளிட்டோர் இதில் கலந்து கொண்டனர்.