புதிய கட்சிகளை இணைத்த ஐ.ம.சு.முன்னணிக்கு வலுச்சேர்க்க தீர்மானம்!

ஐக்கிய மக்கள் சுதந்திர முன்னணியுடன் இணைந்துள்ள கூட்டணி கட்சிகளுடன் மேலும் சில கட்சிகளை இணைத்து கொண்டு அந்த முன்னணிக்கு வலுசேர்க்க தீர்மானிக்கப்பட்டுள்ளது.
குறிப்பாக அடுத்த பொதுத் தேர்தலில் புதிய தோற்றத்துடன் தேர்தலை சந்தித்து வலுவான அரசாங்கத்தை அமைக்கும் நோக்கில் இந்த தீர்மானம் எடுக்கப்பட்டுள்ளது.

இதனடிப்படையில், எதிர்வரும் 23 ஆம் திகதி கொழும்பு விகாரமஹாதேவி பூங்காவில் நடைபெறும் நிகழ்வில் புதிய கூட்டணி அறிவிக்கப்பட உள்ளதாக தெரியவந்துள்ளது.

அதேவேளை ஐக்கிய மக்கள் சுதந்திர முன்னணியின் வேட்பாளர் பட்டியலில் போட்டியிட்டு வந்த விமல் வீரவன்ஸவின் தேசிய சுதந்திர முன்னணி கூட்டணியில் இருந்து நீக்கப்பட்டுள்ளது.

அதேபோல், தற்போதைய ஜனாதிபதி மற்றும் அரசாங்கத்தை விமர்சிக்கும் நபர்களும் முன்னணியில் இருந்து நீக்கப்பட உள்ளதாக தகவல்கள் வெளியாகியுள்ளன.