யுத்தகளத்தில் உயிரிழப்புக்கள் ஏற்படுவது சகஜம்: பிள்ளையான் - தமிழ் மக்கள் விடுதலைப் புலிகள் கட்சியினால் வெருகல் படுகொலை தினம் அனுஸ்டிப்பு

தமிழ் மக்கள் விடுதலைப் புலிகள் கட்சியினால் வெருகல் படுகொலை தினம் நேற்று மாலை வெருகல் மலைப் பூங்காவில் அனுஸ்டிக்கப்பட்டது.
இதன் போது தமிழ் மக்கள் விடுதலைப் புலிகள் கட்சியின் தலைவரும் கிழக்கு மாகாண முன்னாள் முதலமைச்சருமான சிவநேசதுரை சந்திரகாந்தன் மற்றும் அக்கட்சியின் பொதுச் செயலாளர் பூ.பிரசாந்தன் உட்பட கட்சி நிர்வாகிகள் மற்றும் பொதுமக்கள் என பலரும் கலந்து கொண்டனர்.

இதன்போது வெருகல் படுகொலையில் உயிரிழந்தவர்களின் நினைவாக சுடரேற்றப்பட்டு மௌன அஞ்சலியும் செலுத்தப்பட்டது.

2004ம் ஆண்டு ஏப்ரல் மாதம் 10ம் திகதி அதிகாலை வன்னியில் இருந்து வந்த தமிழீழ விடுதலைப் புலிகளின் படையெடுப்பினால் முதலாவது சமர் ஆரம்பித்த இடமாக மட்டக்களப்பு வாகரை, வெருகல் மலை அமைந்துள்ளது.

கிழக்கு மாகாணத்தைச் சேர்ந்த 207க்கு மேற்பட்ட ஆண், பெண்கள் இந்த யுத்தத்தின் போது படுகொலை செய்யப்பட்டனர்.

இதில் உயிரிழந்தவர்களின் ஞாபகார்த்தமாக இந்த வெருகல் படுகொலை நினைவு தினம் தமிழ் மக்கள் விடுதலைப்புலிகள் கட்சியினால் அனுஸ்டிக்கப்பட்டு வருகின்றமை குறிப்பிடத்தக்கது.