19வது திருத்தத்துக்கு சு.க. ஆதரவு வழங்காது! நாட்டின் பொருளாதாரம் பின்னடைவு!- எதிர்க்கட்சித்தலைவர்

அரசியல் அமைப்பு விதிமுறைக்கு முரணான வகையில் 19 வது திருத்தச் சட்டத்தினை நிறைவேற்ற முயற்சிக்கும் ரணில் விக்கிரமசிங்கவின் திட்டத்தினை வன்மையாக கண்டிக்கின்றோம். ஸ்ரீலங்கா சுதந்திரக்கட்சியின் ஆதரவு 19வது திருத்தத்திற்கு கிடைக்காது என எதிர்க்கட்சி தலைவர் நிமல் சிறிபால டி சில்வா தெரிவித்தார்
எதிர்வரும் 10ம் திகதி பாராளுமன்றத்தில் 19வது திருத்தம் விவாதத்திற்கு உப்படுத்தக்கூடாது. கட்சி தலைவர்கள் கூட்டத்திலும் அத்தீர்மானத்தினை எடுத்துள்ளதாகவும் அவர் குறிப்பிட்டார்.

எதிர்க்கட்சி தலைவர் காரியாலயத்தில் நேற்று இடம்பெற்ற செய்தியாளர் சந்திப்பின் போதே அவர் மேற்கண்டவாறு குறிப்பிட்டார். அவர் மேலும் குறிப்பிட்டதாவது

தற்போது கொண்டு வரப்பட்டுள்ள 19 வது திருத்தச்சட்டம் அரசியல் அமைப்பின் வெளிப்பாடுகளுக்கு முரணானது.

19வது திருத்தச்சட்டம் ஜனாதிபதி முறைமையினை நீக்குவது மட்டும் அல்லாது சுயாதீன ஆணைக்குழுவினை செயற்படுத்துவதும் தேர்தல் முறைமையில் மாற்றத்தினை கொண்டு வருவதுமேயாகும்.

ஆனால் தேர்தல் முறைமையில் மாற்றம் கொண்டு வருவோம் எனக் கூறிக்கொண்டு ஜனாதிபதி முறைமையினை நீக்கி அதை பிரதமரின் அதிகாரமாக மாற்றவே முயற்சிக்கின்றனர்.

எனவே எதிர்வரும் 9ம், 10ம் திகதிகளில் பாராளுமன்றத்தில் 19 வது திருத்தம் தொடர்பிலான விவாதம் இடம் பெறக்கூடாது.

மாறாக மீண்டும் அரசியல் அமைப்பிற்கு அமைய வர்த்தமானி அறிவித்தல் முறைமையாக மேற்கொள்ளப்பட்ட பின்னர் நீதிமன்ற விசாரணைக்கு விடப்பட வேண்டும்.

எனவே முறையான செயற்பாடுகளை கையாளும் வரையில் எமது ஆதரவு கிடைக்கப் போவதில்லை.

அதேபோல் 19 வது திருத்ததத்தை நிறைவேற்றி அதை நடைமுறைப்படுத்தாது தேர்தல் முறைமையில் மாற்றத்தினை கொண்டு வந்து இரண்டு திருத்தங்களையும் ஒன்றாக செயற்படுத்துவதாயின் நாம் இணக்கம் தெரிவிக்க முடியும் எனக் குறிப்பிட்டார்.

அரசாங்கம் கடன் பெற்றே அரச ஊழியர்களுக்கு சம்பளம் வழங்க உள்ளது - எதிர்க்கட்சித்தலைவர்

அரசாங்கம் கடன் பெற்றுக் கொண்டே அரச ஊழியர்களுக்கு சம்பளம் வழங்க உள்ளது என எதிர்க்கட்சித் தலைவர் நிமால் சிறிபால டி சில்வா தெரிவித்துள்ளார்.

இம்மாத சம்பளத்தை வழங்குவதற்கு அரசாங்கம் 400 பில்லியன் ரூபா திறைசேரி பிணைகளை வெளியிட உள்ளது.

இது தொடர்பிலான யோசனைத் திட்டமொன்று இன்று நாடாளுமன்றில் சமர்ப்பிக்கப்பட உள்ளது.

நாடாளுமன்றில் இன்று விவாதிக்கப்படவிருந்த உரிமைப் பதிவு குறித்த சட்டம் இன்று விவாதிக்கப்படாது, நாளைய தினம் விவாதிக்கப்பட உள்ளது.

அரசாங்கம் 100 நாட்களுக்கு முன்னதாகவே பிணைப்பத்திரங்களை விநியோகம் செய்ய நேரிட்டுள்ளது.

பிணைப்பத்திரங்களை விநியோகம் செய்தே அரச ஊழியர்களின் இம்மாத சம்பளத்தை 10ம் திகதிக்கு முன்னதாக வழங்க உள்ளது.

இன்று நாடாளுமன்றில் சமர்ப்பிக்கப்பட உள்ள பிணைப்பத்திரம் குறித்த யோசனைத் திட்டம் தோற்கடிக்கப்பட்டால், அரச ஊழியர்கள் புத்தாண்டை கொண்டாட முடியாது.

கடன் பெற்றுக்கொள்ளாது பொருளாதாரத்தை கட்டியெழுப்ப முடியும் என வாய்ச் சாவடால் விட்ட ஆளும் கட்சியின் பொருளியல் நிபுணர்கள், அரச ஊழியர்களுக்கு சம்பளத்தை வழங்க முடியாத நிலை ஏற்பட்டுள்ளது.

நாட்டின் பொருளாதாரம் பின்னடைவை எதிர்நோக்கியுள்ளது என எதிர்க்கட்சித் தலைவர் குற்றம் சுமத்தியுள்ளார்.

கொழும்பில் நடைபெற்ற செய்தியாளர் சந்திப்பில் நேற்று அவர் இதனைத் தெரிவித்துள்ளார்.