மஹிந்த, விமலுக்கு ஆதரவு வழங்கும் ஐ.தே.க! ஜனாதிபதி குற்றச்சாட்டு

முன்னாள் ஜனாதிபதி மகிந்த ராஜபக்ச மற்றும் முன்னாள் அமைச்சர் விமல் வீரவன்ஸ ஆகியோரின் அரசியல் செயற்பாடுகளுக்கு, ஐக்கிய தேசிய கட்சியின் சில தலைவர்களின் அனுசரணைகள் கிடைத்துள்ளதாக ஜனாதிபதி மைத்திரிபால சிறிசேன குற்றம் சுமத்தியுள்ளார்.
இலங்கை மன்றக் கல்லூரியில் நேற்று இடம் பெற்ற ஐக்கிய மக்கள் சுதந்திர முன்னணியின் தலைவர்களின் கூட்டத்தில் ஜனாதிபதி இதனை கூறியதுடன் அவர்களின் பெயர் விபரங்களையும் வெளியிட்டுள்ளார்.

ஸ்ரீலங்கா சுதந்திரக் கட்சியின் தலைவர்கள், மக்கள் ஐக்கிய முன்னணியின் தலைவர் தினேஷ் குணவர்தன, ஈபிடிபியின் தலைவர் டக்லஸ் தேவானந்தா, பொடிஅப்புஹாமி மற்றும் மக்கள் கட்சியின் பிரதிநிதிகளும் கூட்டத்தில் கலந்துக்கொண்டனர்.

இக்கூட்டத்தில் மகிந்தவை பிரதமராக்குமாறு வலியுறுத்தி விமல் வீரவன்ச நடாத்துகின்ற கூட்டங்கள் தொடர்பாக கட்சி தலைவர்கள் கவனம் செலுத்தியுள்ளனர்.

மேலும் புதிய அரசியலமைப்பு சீர்திருத்தம் மற்றும் புதிய தேர்தல் முறை தொடர்பாக மக்களுக்கு தெளிவுப்படுத்தும் கூட்டங்களை நாடு முழுவதும் நடத்தவும் தீர்மானிக்கப்பட்டுள்ளது.

இதேவேளை ஜாதிக ஹெல உறுமய, இலங்கை கம்யூனிஸ்ட் கட்சி மற்றும் லங்கா சமசமாஜக் கட்சிகளை கூட்டணியுடன் இணையுமாறு அழைப்பு விடுப்பது எனவும் கூட்டத்தில் தீர்மானிக்கப்பட்டது.

அத்துடன் ஐக்கிய மக்கள் சுதந்திர முன்னணியில் வெற்றிடமாக உள்ள தேசிய அமைப்பாளர் பதவிக்கு ஜனக்க பண்டார தென்னக்கோன் நியமிக்கப்பட்டதுடன் முன்னணியின் உப தலைவராக டக்ளஸ் தேவானந்தா, பிரதிச் செயலாளராக மகிந்த அமரவீரவும் நியமிக்கப்பட்டுள்ளனர்.