13வது திருத்தச் சட்டத்தினை அமுல்படுத்தக் கூடிய சூழலை மோடி உருவாக்க வேண்டும்: டக்ளஸ்

இலங்கைக்கு விஜயம் செய்துள்ள இந்தியப் பிரதமர் நரேந்திர மோடி, 13வது திருத்தச் சட்டத்தை முழுமையாக அமுல்படுத்துவதற்கு தேவையான சூழலை உருவாக்க வேண்டுமென முன்னாள் அமைச்சர் டக்ளஸ் தேவானந்தா தெரிவித்துள்ளார்.
வடக்கிற்கு விஜயம் செய்துள்ள இந்தியப் பிரதமர் முன்னாள் அமைச்சர் டக்ளசை சந்தித்து கலந்துரையாடியுள்ளார்.

டக்ளஸ் தேவானந்தா மேலும் தெரிவிக்கையில்,

1987 ஆம் ஆண்டு ஏற்படுத்தப்பட்ட இலங்கை இந்திய ஒப்பந்தத்தின் வரப்பிரசாதமாக மாகாணசபை உள்ளடங்கிய 13வது திருத்தச்சட்டம் தமிழ் பேசும் மக்களுக்கு கிடைக்கப்பெற்றது.

அதுபோல் தற்போதைய பிரதமர் நரேந்திரமோடி, 13வது திருத்தச் சட்டத்தை முழுமையாக அமுல்படுத்துவதற்கு தேவையான சூழலை உருவாக்குவதற்கு தமது தார்மீகக் பங்களிப்பை வழங்கவேண்டுமென எதிர்பார்க்கின்றோம்.

கடந்த யுத்த காலங்களின்போது பேரழிவைச் சந்தித்து தற்போது அபிவிருத்தியூடாக மீளக் கட்டியெழுப்பப்பட்டு வரும் வடக்கு கிழக்குப் பகுதிகளின் அபிவிருத்திப் பணிகளில் இந்திய அரசின் பங்களிப்பும் உதவி, ஒத்தாசைகளும் முக்கிய இடத்தைப் பெற்றுள்ளதாக அவர் இதன்போது குறிப்பிட்டார்.