அவன்கார்ட் நிறுவன தலைவர் நைஜீரியா செல்ல சமர்ப்பித்த மனுவை நிராகரித்த நீதிமன்றம்

அவன்கார்ட் தனியார் பாதுகாப்பு நிறுவனத்தின் தலைவர் எச்.என். யாப்பா சேனாதிபதி, வர்த்தக நடவடிக்கை ஒன்றுக்காக நைஜீரியா செல்ல அனுமதி வழங்குமாறு விடுத்த கோரிக்கையை கொழும்பு நீதவான் கியான் பிலப்பிட்டிய இன்று நிகராரித்துள்ளார்.
சந்தேக நபருக்கு வெளிநாடு செல்ல அனுமதி வழங்கினால், குற்றப் புலனாய்வுத் திணைக்களத்தின் விசாரணை இடையில் முடங்கும் என பொலிஸார் நீதிமன்றத்தில் தெரிவித்தனர்.

இதனையடுத்து பாதுகாப்பு அமைச்சு மற்றும் வெளிவிவகார அமைச்சு ஆகியவற்றின் செயலாளர்களது அறிக்கைகளை அடிப்படையாக கொண்டு நீதவான் மேற்படி உத்தரவை பிறப்பித்துள்ளார்.

நிறுவனத்தின் வர்த்தக நடவடிக்கை ஒன்றுக்காக நைஜீரியா செல்ல சேனாதிபதிக்கு அனுமதி வழங்குமாறு அவரது சட்டத்தரணிகள் நீதிமன்றத்தில் கோரினர்.

நைஜீரியாவுக்கு செல்ல முடியாது போனால், அவருக்கும் நாட்டுக்கும் 3 ஆயிரத்து 500 மில்லியன் நஷ்டம் ஏற்படும் எனவும் சட்டத்தரணிகள் வாதிட்டனர்.

எனினும் குறித்த கோரிக்கையை நிராகரித்த நீதவான், வழக்கு விசாரணைகளை எதிர்வரும் ஜூலை மாதம் 11 ஆம் திகதிக்கு ஒத்திவைத்தார்.