கைதான காரீய நிறுவனத்தின் 4 பணிப்பாளர்களும் பிணையில் விடுதலை

காரீய மோசடியில் ஈடுப்பட்ட குற்றச்சாட்டின் பேரில் கைது செய்யப்பட்ட இலங்கை காரீய நிறுவனத்தின் குழுமப் பணிப்பாளர்கள் நால்வரும் பிணையில் விடுதலை செய்யப்பட்டுள்ளனர்.
இவர்கள் நேற்றைய தினம் கொழும்பு கோட்டை நீதவான் நீதிமன்றத்தில் ஆஜர்படுத்தப்பட்ட போதே பிணையில் விடுதலை செய்யப்பட்டுள்ளனர்.

நுரைச்சோலையிலுள்ள லக்விஜய அனல் மின் நிலையத்திற்கு கொண்டு வரப்பட்ட காரீயத்தில் மோசடி இடம்பெற்றதினால் இலங்கை மின்சார சபைக்கு ஆயிரத்து 536 மில்லியன் ரூபா நட்டம் ஏற்பட்டது என செய்யப்பட்ட முறைப்பாட்டையடுத்தே இவர்கள் கைது செய்யப்பட்டுள்ளனர்.

சந்தேக நபர்களை நீதிமன்றில் ஆஜர்படுத்திய பின்னர் நால்வரும் தலா ஒரு மில்லியன் ரூபா பெறுமதியான இரு சரீர பிணையில் விடுதலை செய்யப்பட்டுள்ளதுடன், குறித்த வழக்கு எதிர்வரும் 18ம் திகதி வரை ஒத்திவைக்கப்பட்டுள்ளது.

இதேவேளை குறித்த மோசடியுடன் தொடர்புடைய மேலும் இரு குழுமப்பணிப்பாளர்களை கைது செய்யும் நடவடிக்கை தீவிரப்படுத்தப்பட்டுள்ளதாக பொலிஸ் தலைமையகம் தெரிவித்துள்ளது.