ஜனாதிபதி செயலகத்தின் முன்னாள் போக்குவரத்துப் பணிப்பாளர் பிணையில் விடுதலை

ஜனாதிபதி செயலகத்தின் முன்னாள் போக்குவரத்துப் பணிப்பாளர் கீர்த்தி சமரசிங்க திஸாநாயக்க பிணையில் விடுதலை செய்யப்பட்டுள்ளார்.
இவர் 25000 ரூபா ரொக்கப் பிணை மற்றும் ஒரு மில்லியன் ரூபா சரீரப் பிணை அடிப்படையில் விடுதலை செய்யப்பட்டுள்ளார். கோட்டை நீதவான் திலின கமகேவினால் இந்த உத்தரவு பிறப்பிக்கப்பட்டுள்ளது.

ஜனாதிபதி செயலகத்திற்கு சொந்தமான வாகனங்களை காணவில்லை என்ற அடிப்படையிலேயே போக்குவரத்துப் பிரிவு பணிப்பாளர் கைது செய்யப்பட்டிருந்தார். எனினும் காணாமல் போனதாக தெரிவிக்கப்பட்ட இரண்டு வாகனங்களும் மீட்கப்பட்டுள்ளன.

அதனடிப்படையில் பிரதமரின் உத்தியோகபூர்வ இல்லத்தின் கராஜிலிருந்து குண்டு துளைக்காத ஒரு வாகனமும், கொஹவெல தனியார் கராஜ் ஒன்றிலிருந்து மற்றுமொரு வாகனமும் மீட்கப்பட்டுள்ளது.

காணாமல் போனதாக கூறப்படும் மோட்டார் சைக்கிள் சேதப்படுத்தப்பட்டிருக்கலாம் என பொலிஸார் சந்தேகம் வெளியிட்டுள்ளனர். சந்தேக நபர் வெளிநாட்டு பயணங்களை மேற்கொள்ள தடை விதிக்கப்பட்டுள்ளதுடன், ஒவ்வொரு மாதமும் கடைசி ஞாயிற்றுக்கிழமை பொலிஸ் நிலையத்தில் ஆஜராக வேண்டுமெனவும் தெரிவிக்கப்பட்டுள்ளது.