இந்தியாவிற்கு தங்கம் கடத்த முயன்ற இலங்கையர் கைது

இலங்கையிலிருந்து சட்டவிரோதமான முறையில் சீர் செய்யப்படாத தங்க கட்டிகளை, இந்தியாவுக்கு கடத்திச் சென்ற இலங்கையர் ஒருவர் கொச்சி விமான நிலையத்தில் கைது செய்யப்பட்டுள்ளார்.
ஸ்ரீலங்கன் எயார்லைன்ஸ் விமானத்தில் சென்ற அவர் கொச்சி விமான நிலையத்தில் சந்தேகத்திற்கிடமான முறையில் செயற்பட்டதன் காரணமாக கைது செய்யப்பட்டுள்ளார்.

அவர் தான் கடத்திச் சென்ற தங்கங்களை விழுங்கிய நிலையில், நேற்று எர்னாக்குளம் அரச மருத்துவமனையில் அனுமதிக்கப்பட்டுள்ளார்.

பொலிஸார் அவரை விசாரிக்க முற்பட்ட போது தாம் சுகவீனமுற்றிருப்பதாக தெரிவித்து தப்பிக்க முனைந்ததாக தெரிவிக்கப்படுகின்றது.

குறித்த நபரை மருத்துவமனையில் அனுமதிக்கப்பட்டு பரிசோதனைக்கு உட்படுத்தப்பட்ட போது, தங்க கட்டிகளை விழுங்கியிருந்தமை தெரியவந்துள்ளது.

அவரின் வயிற்றுப் பகுதியிலிருந்து ஒரு தங்க கட்டி மீட்கப்பட்ட நிலையில் அவர் மொத்தமாக 13 தங்க கட்டிகளை விழுங்கியிருந்ததாக மருத்துவமனை வட்டாரங்கள் தெரிவிக்கின்றனர்.