முன்பள்ளி ஆசிரியர்கள் என்றால் ஏளனமா?: மட்டக்களப்பில் வெடித்த போராட்டம்

மட்டக்களப்பு மாவட்டத்திலுள்ள முன்பள்ளி ஆசிரியர்களை அரச சேவைக்குள் உள்வாங்கி அரச நியமனங்களை வழங்குமாறு கோரி, மட்டக்களப்பு நகரிலுள்ள காந்திப்பூங்காவுக்கு முன்பாக அடையாள ஆர்ப்பாட்டம் இன்று முன்னெடுக்கப்பட்டது.
மட்டக்களப்பு மாவட்டத்திலுள்ள 500 க்கும் மேற்பட்ட முன்பள்ளி ஆசிரியர்கள் இந்த அடையாள ஆர்ப்பாட்டத்தில் கலந்துகொண்டு, பேரணியாக மட்டக்களப்பு கச்சேரிவரை சென்றனர்.

இந்த நிலையில், தங்களது கோரிக்கைகள் அடங்கிய மகஜரை, மட்டக்களப்பு மாவட்ட அரசாங்க அதிபர் திருமதி பி.எஸ்.எம்.சார்ள்ஸிடம் இவர்கள் கையளித்துள்ளனர்.

அண்மையில் கிழக்கு மாகாணசபையாலும் கல்வித் திணைக்களத்தாலும் முன்பள்ளி ஆசிரியர்களை உள்வாங்கி அவர்களுக்கான நியமனங்களை வழங்குவதாக தெரிவித்த போதிலும், அது மேற்கொள்ளப்படாமையால் ஆர்ப்பாட்டத்தில் ஈடுபட்டதாக முன்பள்ளி ஆசிரியர்கள் தெரிவித்தனர்.

மட்டக்களப்பு மாவட்டத்திலுள்ள 5 கல்வி வலயங்களிலும் 546 முன்பள்ளிகள் உள்ளதுடன், மட்டக்களப்பில் 107 முன்பள்ளி ஆசிரியர்களும் கல்குடாவில் 324 முன்பள்ளி ஆசிரியர்களும் பட்டிருப்பில் 259 முன்பள்ளி ஆசிரியர்களும் மட்டக்களப்பு மத்தியில் 300 முன்பள்ளி ஆசிரியர்களும் மட்டக்களப்பு மேற்கில் 418 முன்பள்ளி ஆசிரியர்கள் உள்ளனர்.