சல்மான் கான் போன்றவர்களை அழைத்து பிரச்சாரம் செய்திருக்கக் கூடாது: சுசில் பிரேமஜயந்த

கடந்த ஜனாதிபதி தேர்தலின் போது முன்னாள் ஜனாதிபதி மஹிந்த ராஜபக்ச பாலிவுட் நடிகர் சல்மான் கான் போன்றவர்களை அழைத்து பிரச்சாரம் செய்திருக்கக் கூட்டாது என ஐக்கிய மக்கள் சுதந்திரக் கூட்டமைப்பின் பொதுச்செயலாளர் சுசில் பிரேமஜயந்த தெரிவித்துள்ளார்.
சல்மான் போன்ற இந்திய நடிகர்களை அழைத்து பிரச்சாரம் செய்ததன் மூலம் தேவையற்ற பண விரயம் ஏற்பட்டது. முன்னாள் ஜனாதிபதி மஹிந்த ராஜபக்சவின் தேர்தல் பிரச்சாரப் பணிகளை தொழில்நுட்ப நிபுணர்களே முன்னெடுத்தனர்.

அரசியல்வாதிகள் பிரச்சார நடவடிக்கைகளை மேற்கொள்ளவில்லை. இந்த அளவிற்கு சுவரொட்டிகள் கட்அவுட்கள் பதாகைகள் எதற்காக என்ற நீதியான சந்தேகம் மக்கள் மத்தியில் எழுந்தது.

இதற்கு நாம் எவ்வாறான பதிலளித்தாலும் அதில் பயனிருக்கவில்லை என சுசில் பிரேமஜயந்த தெரிவித்துள்ளார். சர்வதேச சிங்கள ஊடகமொன்றுக்கு வழங்கிய நேர் காணலில் அவர் இதனைத் தெரிவித்துள்ளார்.