அன்றும் காதலர் தினம்…இன்றும் காதலர் தினம்: முதல்வராக பதவியேற்கிறார் கெஜ்ரிவால்

நடந்து முடிந்த டெல்லி சட்டப்பேரவை தேர்தலில் வெற்றி பெற்ற ஆம் ஆத்மி கட்சி தலைவர் கெஜ்ரிவால் இன்று முதல்வராக பதவியேற்கிறார்.
இந்த நிகழ்ச்சி ராம்லீலா மைதானத்தில் பிரம்மாண்ட அளவில் நடைபெறுகிறது.

துணை முதல்வராக மணீஷ் சிசோடியாவும், அமைச்சர்களாக மேலும் 5 பேர் பொறுப்பேற்க உள்ளதாகவும் ஆம் ஆத்மி வட்டாரங்கள் தகவல் தெரிவிக்கின்றன.

அவர்களுக்கு கவர்னர் நஜீப் ஜங் பதவிப் பிரமாணமும், ரகசிய காப்பு பிரமாணமும் செய்து வைக்கிறார்.

பதவியேற்பு விழாவில் கலந்து கொள்ளுமாறு, பிரதமர் நரேந்திர மோடிக்கு கெஜ்ரிவால் அழைப்பு விடுத்தார். ஆனால், அன்றைய தினம் மகாராஷ்டிர மாநிலத்தில் நடைபெறும் நிகழ்ச்சியில் பங்கேற்க உள்ளதால், தன்னால் கலந்து கொள்ள முடியாது என்று கூறி, மோடி தவிர்த்து விட்டார்.

கடந்த முறை முதல்வராக இருந்தபோது, 2014. பிப்ரவரி 14ம் திகதி அன்று தனது முதல்வர் பதவியை கெஜ்ரிவால் ராஜினாமா செய்தார்.

அதே தினமான இன்று மீண்டும் அவர் புதிய முதல்வராக பதவியேற்க உள்ளார் என்பது குறிப்பிடத்தக்கது.