மோசடியில் ஈடுபட்ட சஜின்வாஸ் மீதான விசாரணைகள் தாமதம் - ஆணைக்குழு மீது குற்றச்சாட்டு

சஜின்வாஸ் குணவர்த்தனவுக்கு எதிரான குற்றச்சாட்டு தொடர்பில் லஞ்ச ஊழல் ஒழிப்பு ஆணைக்குழு விசாரணையை தாமதிப்பதாக குற்றம் சுமத்தப்பட்டுள்ளது.
குறுகிய காலத்துக்குள் அதிகளவான சம்பாதியத்தை பெற்ற முன்னாள் வெளியுறவுத்துறை அமைச்சின் கண்காணிப்பு நாடாளுமன்ற உறுப்பினர் சஜின்வாஸ் குணவர்த்தன தொடர்பில் லஞ்ச ஊழல் ஆணைக்குழுவில் முறைப்பாடு செய்யப்பட்டுள்ளது.

ஜே.வி.பியின் மத்திய மாகாணசபை உறுப்பினர் வசந்த சமரசிங்க இந்த முறைப்பாட்டை செய்துள்ளார்.

முறைப்பாட்டை செய்து இரண்டு வாரங்களாகியும் விசாரணைகள் முன்னெடுக்கப்படவில்லை என்று வசந்த சமரசிங்க குற்றம் சுமத்தியுள்ளார்.

துபாயில் உள்ள ரின்கோ சர்வதேச நிறுவனத்தில் சாதாரண எழுதுவினைஞராக தொழில் புரிந்த சஜின்வாஸ் குணவர்த்தன, கடன்களை மீளச்செலுத்தவில்லை. அத்துடன் தனியார்துறையில் விமானி பயிற்சிகளை பெற்றுத்தருவதாக கூறி இளைஞர்கள் பலருக்கு கொடுத்த உறுதிமொழிகளை நிறைவேற்றவில்லை போன்ற குற்றச்சாட்டுக்கள் சுமத்தப்பட்டுள்ளன.

எனினும் தம்மீது சுமத்தப்பட்டுள்ள குற்றச்சாட்டுக்களை வாஸ் மறுத்துள்ளார்.