தலதா மாளிகையின் தியவதன நிலமேயாக யோஷித்த ராஜபக்ச

ஸ்ரீ தலதா மாளிகையின் தற்போதைய தியவதன நிலமே நிலங்க தேலபண்டாரவை ஸ்ரீலங்கா சுதந்திரக் கட்சியின் அனுராதபுரம் மாவட்டத்தின் அமைப்பாளராக நியமிக்க ராஜபக்சவினர் தயாராகி வருகின்றனர்.
தேலபண்டாரவை கட்சியின் அமைப்பாளராக நியமித்து விட்டு தலதா மாளிகையின் தியவதன நிலமேயாக ஜனாதிபதியின் புதல்வர் யோஷித்த ராஜபக்சவை நியமிக்க திட்டமிடப்பட்டுள்ளது.

இதற்கான அடிப்படை பணிகள் முன்னெடுக்கப்பட்டுள்ளதுடன் தேலபண்டார தற்பொழுது அனுராதபுரத்தில் அரசியல் செயற்பாடுகளை ஆரம்பித்துள்ளார்.

தனது அரசியல் ஸ்திரத்தன்மைக்கு தேவையான பின்னணியை உருவாக்கும் நோக்கில் விகாரைகளுக்கு பொருட்கள் உள்ளிட்டவற்றை விநியோகித்து வருகிறார்.

தலதா மாளிகையின் தியவடன நிலமேயாக தெரிவு செய்யப்படுபவர் மேல்நாட்டு சிங்கள பௌத்த மரபை சார்ந்தவராக இருக்க வேண்டும்.

யோஷித்த ராஜபக்ச, மேல் நாட்டு சிங்கள பௌத்தரான லொஹான் ரத்வத்தவின் மகளை திருமணம் செய்ய உள்ளார்.

எவ்வாறாயினும் குறித்த தியவதன நிலமே பதவிக்கு தெரிவு செய்யப்படுவதற்காக கண்டி பிரதேச செயலாளர்கள் மற்றும் அங்குள்ள ஆலயங்களின் பஸ்நாயக்க நிலமேமார் வாக்களிக்க வேண்டும்.

தேர்தலில் போட்டியிடும் நபர் அதற்கான தகுதிகளை கொண்டிருந்தாலும் வாக்களிப்பவர்களின் பெரும்பான்மையான வாக்குகளை பெற வேண்டும்.

ராஜபக்சவினர் கீழ் நாட்டு சிங்கள பௌத்த பரம்பரையை சேர்ந்தவர்கள் என்பது குறிப்பிடத்தக்கது.