அரசியலமைப்பை மாற்ற திருத்தங்களை கோரும் பிரதமர் ரணில்

நிறைவேற்று அதிகாரம் கொண்ட ஜனாதிபதி ஆட்சி முறையை ஒழிப்பது சம்பந்தமான சட்டமூலத்திற்கு தேவையான திருத்த யோசனைகளை துரிதமாக வழங்குமாறு பிரதமர் ரணில் விக்ரமசிங்க, அரசியல்கட்சிகளின் தலைவர்களுக்கு அறிவித்துள்ளதாக தெரியவருகிறது.
இந்த திருத்தச் சட்ட மூலம் இம்மாதம் நாடாளுமன்றத்தில் சமர்பிக்கப்பட உள்ளதுடன் 68 பக்கங்களை கொண்ட சட்டமூலத்தின் பிரதிகள் பிரதமரால், நாடாளுமன்றத்தில் அங்கம் வகிக்கும் அரசியல் கட்சிகளுக்கு அண்மையில் வழங்கப்பட்டதாக கூறப்படுகிறது.

ஸ்ரீலங்கா சுதந்திரக் கட்சியின் அரசியலமைப்பு விவகாரம் தொடர்பான குழு, சட்டமூலத்தை ஆராய்ந்து, கட்சியின் யோசனைகளையும் திருத்தங்களையும் அடுத்த வாரத்திற்குள் பிரதமரிடம் கையளிக்க நடவடிக்கை எடுக்கப்படும் என அந்த கட்சியின் தேசிய அமைப்பாளர் சுசில் பிரேமஜயந்த தெரிவித்துள்ளார்.

அதேவேளை அரசியலமைப்புத் திருத்தச் சட்டத்தை அவசர சட்டமூலமாக கொண்டு வராது, அதனை ஆராய இரண்டு வார கால அவகாசம் வழங்க வேண்டும் என மக்கள் ஐக்கிய முன்னணியின் தலைவரான தினேஷ் குணவர்தன கோரிக்கை விடுத்துள்ளார்.