நான் நேரடியாகவே கடவுளிடம் பேசுகிறேன்: சர்ச்சை பெண் சாமியார் ராதே மா

மும்பையை சேர்ந்த சர்ச்சைக்குரிய பெண் சாமியார் ராதே மா, ”நான் நேரடியாகவே கடவுளிடம் பேசுகிறேன், அவர் எனக்கு நியாயம் வழங்குவார்” என்று தெரிவித்துள்ளார்.
பெண் சாமியார் ராதே மா (46) குட்டைப் பாவாடை அணிந்து திரைப்பட இசைக்கு ஏற்ப நடனம் ஆடும் வீடியோ சமூக வலைத்தளங்களில் வெளியாகியது.

10 வகுப்பு மட்டுமே படித்துள்ள இவர் 18 வயதில் மோகன் சிங் என்பவரை திருமணம் செய்து கொண்டார்.

ராம்தீன் தாஸ் என்ற சாமியாரை சந்தித்த பின்னர் தன்னுடைய கணவரை பிரிந்து சாமியாராக வலம் வருகிறார்.

இந்நிலையில், மதத்தின் பேரை சொல்லி ராதே மா மக்களை ஏமாற்றி வருவதாக போரிவலியை சேர்ந்த ஒரு ஆர்வலர் பொலிசில் புகார் செய்த நிலையில், ராதே மா தலைமறைவாகி விட்டார்.

இதையடுத்து அவுரங்காபாத் அருகே படேகாவ் என்ற இடத்தில் உள்ள நட்சத்திர ஹொட்டலில் தங்கியிருந்த அவரை பொலிசார் கண்டுபிடித்து விசாரணை நடத்தினர்.

இந்நிலையில், ராதே மா நேற்று காலையில் மும்பை வந்த போது, தனது ஆண், பெண் சீடர்களுடன் சேர்ந்து உற்சாகமாக நடனம் ஆடினார்.

பின்னர் பேசிய அவர், தன் குடும்பத்தை பற்றி கூறுகையில், தனக்கு இரண்டு மகன்கள் இருப்பதாக தெரிவித்துள்ளார்.

மேலும், மனிதர்கள் பற்றி நான் புகார் கூறமாட்டேன். ஏனெனில் நான் நேரடியாகவே கடவுளிடம் பேசுகிறேன். அவர் எனக்கு நியாயம் வழங்குவார்.

நல்ல முடிவு எடுப்பதாக கடவுள் ஏற்கனவே என்னிடம் உறுதி அளித்துள்ளார் என்று பேசியுள்ளார்.