பீட்ரூட் கடலைப்பருப்பு பொரியல்

by oviya Fri Jul 03, 2015 9:40 am

பீட்ரூட் - ஒன்று
கடலைப்பருப்பு - ஒன்றரை மேசைக்கரண்டி
மிளகாய் வற்றல் - ஒன்று
கடுகு - அரை தேக்கரண்டி
தேங்காய் துருவல் - கால் கப்
உப்பு - அரை தேக்கரண்டி
எலுமிச்சை சாறு - ஒரு தேக்கரண்டி
கறிவேப்பிலை - ஒரு கொத்து
மஞ்சள் தூள் - கால் தேக்கரண்டி
தனி மிளகாய் தூள் - அரை தேக்கரண்டி
எண்ணெய் - 2 தேக்கரண்டி

பீட்ரூட்டை தோல் சீவி விட்டு சிறு சிறு துண்டுகளாக நறுக்கி தண்ணீரில் அலசிக் கொள்ளவும். தேங்காயை துருவிக் கொள்ளவும். மற்ற அனைத்து தேவையான பொருட்களையும் தயாராக எடுத்து வைத்துக் கொள்ளவும்.

ஒரு தட்டில் கடலைப்பருப்பை போட்டு அதில் மூழ்கும் அளவு தண்ணீர் ஊற்றி இட்லி பானையில் வைக்கவும். பிறகு நறுக்கின பீட்ரூடை ஒரு பாத்திரத்தில் போட்டு பருப்பு வைத்த தட்டின் மேலே வைத்து மூடி போட்டு இரண்டையும் 15 நிமிடம் வேக வைத்து எடுக்கவும். பீட்ரூட்டில் தண்ணீர் சேர்க்க தேவையில்லை.

வாணலியில் எண்ணெய் ஊற்றி காய்ந்ததும் கடுகு போட்டு வெடித்ததும் இரண்டாக கிள்ளிய மிளகாய் வற்றல், கறிவேப்பிலை போட்டு தாளிக்கவும்.

அதன் பிறகு வேக வைத்து எடுத்து வைத்திருக்கும் பீட்ரூட்டை போட்டு உப்பு சேர்த்து நன்கு பிரட்டி விடவும்.

பின்னர் அதில் மஞ்சள் தூள் மற்றும் மிளகாய் தூள் சேர்த்து கிளறி விடவும்.

மிளகாய் வாடை அடங்கியதும் வேக வைத்த கடலை பருப்பை போட்டு கிளறி விடவும்.

இறுதியில் பீட்ரூட்டுடன் தேங்காய் துருவலை சேர்த்து நன்கு ஒன்றாகும் படி கிளறி இறக்கவும். இறக்கி வைத்து எலுமிச்சை சாறை மேலே ஊற்றி கிளறி விடவும்.

பீட்ரூட் கடலைபருப்பு பொரியல் தயார். இது சாம்பார் சாதத்துடன் சாப்பிட ஏற்ற பக்க உணவு.