இளைஞரின் இதயத்தை 40 நிமிடங்கள் நிறுத்தி சிகிச்சையளித்த மருத்துவர்கள்: திக் திக் நிமிடங்கள்

சேலத்தில் நடந்த இதய அறுவை சிகிச்சையில், இளைஞர் ஒருவரின் இதயத்தின் இயக்கத்தை மருத்துவர்கள் சுமார் 40 நிமிடங்கள் நிறுத்தி சிகிச்சை மேற்கொண்டு சாதனை படைத்துள்ளனர்.
சேலம் மாவட்டம் எடப்பாடியை சேர்ந்த இளைஞர் ஒருவர் கடுமையான மூச்சுத் திணறலால் பாதிக்கப்பட்டுள்ளார்.

இதையடுத்து அந்த 18 வயது இளைஞர் சேலம் மோகன் குமாரமங்கலம் பல்நோக்கு உயர்சிகிச்சை அரசு மருத்துவமனையின் இதய சிகிச்சை சிறப்புப் பிரிவில் கடந்த வாரம் அனுமதிக்கப்பட்டுள்ளார்.

அந்த இளைஞரை பரிசோதித்த மருத்துவ குழுவினர் அவரது இதயத்தில் ஓட்டை இருப்பதை கண்டறிந்ததை அடுத்து அவருக்கு அறுவை சிகிச்சையை பரிந்துரைத்துள்ளனர்.

பின்னர் அவருக்கு அதிநவீன இதய நுரையீரல் தானியங்கி கருவியின் உதவியுடன் அறுவை சிகிச்சை மேற்கொள்ளப்பட்டுள்ளது.

சுமார் 4 மணி நேரம் நடந்த அறுவை சிகிச்சையின் போது இளைஞரின் இதயத்தின் இயக்கம், 40 நிமிடங்கள் நிறுத்தி வைக்கப்பட்டு, இதய உறைத்திசுக்கள் மூலம் ஓட்டை முழுவதுமாக அடைக்கப்பட்டுள்ளது குறிப்பிடத்தக்கது.