முன்னைய அரசாங்கம் வெளிக்கவர்ச்சிக்கு மட்டுமே முக்கியத்துவம் கொடுத்தது! சம்பிக்க ரணவக்க

மஹிந்த ராஜபக்ஷ தலைமையிலான அரசாங்கத்தின் அபிவிருத்தி நடவடிக்கைகளின் போது வெளிக்கவர்ச்சிக்கு மட்டுமே முக்கியத்துவம் கொடுக்கப்பட்டதாக அமைச்சர் சம்பிக்க விமர்சித்துள்ளார்.
பெருநகர அபிவிருத்தி மற்றும் மேல்மாகாண அபிவிருத்தி அமைச்சராக நியமிக்கப்பட்டுள்ள அமைச்சர் சம்பிக்க ரணவக்க இன்று காலை செத்சிரிபாயவில் உள்ள தனது அமைச்சில் கடமைகளைப் பொறுப்பேற்றுக் கொண்டார்.

அதனையடுத்து அங்கு சிறு வரவேற்பு உரையொன்றை நிகழ்த்திய அமைச்சர் சம்பிக்க ரணவக்க, மேல் மாகாணத்தை முழுமையாக அபிவிருத்தி செய்வதே எங்கள் முதலாவது இலக்காகும். இதன் போது அனைத்து உட்டகட்டமைப்பு வசதிகளும் அடிப்படையிலிருந்து அபிவிருத்தி செய்யப்படும்.

மஹிந்த ராஜபக்ஷ தலைமையிலான முன்னைய அரசாங்கம் வீடொன்றை திருத்தி அமைக்க வேண்டுமாயின் முன் கூடத்தை மட்டும் அழகுபடுத்தி விட்டு, அதனை காட்சிப்படுத்துவதை வழக்கமாக் கொண்டிருந்தது. வெளிக்கவர்ச்சி மட்டுமே அவர்களின் அபிவிருத்தியின் பிரதான அம்சமாக இருந்தது. ஆனால் நாங்கள் வீட்டின் கொல்லைப்புறம், சமையலறை போன்றவற்றையும் திருத்தி அமைப்பதைப் போன்று அனைத்து உட்கட்டமைப்பு வசதிகளையும் அபிவிருத்தி செய்வதே எங்கள் இலக்காகும்.

கடந்த அரசாங்க காலத்தில் கோத்தபாய ராஜபக்ஷ ஓரிரு நடவடிக்கைகளைப் பாராட்டும் படியாகவும் மேற்கொண்டிருந்தார். அது குறித்து பாராட்டவும் நாம் தயங்கப் போவதில்லை. ஆனால் அவர்களை போலன்றி உண்மையிலேயே அபிவிருத்தி என்பதை செயலில் காட்டுவதே எமது நோக்கமாகும் என்றும் அமைச்சர் சம்பிக்க ரணவக்க தொடர்ந்தும் தெரிவித்துள்ளார்.