மைத்திரியின் ஆதரவு ரணிலுக்கே: ஜோன் அமரதுங்க

எதிர்க்கட்சியின் நம்பிக்கையில்லாப் பிரேரணைக்கு முகம் கொடுப்பதற்கு தயார் நிலையிலுள்ளதாக பொது நிர்வாக அமைச்சர் ஜோன் அமரதுங்க தெரிவித்துள்ளார்.
செய்வதற்கு வேறு எவ்வித வேலையும் இல்லாமையினாலேயே எதிர்க்கட்சி நம்பிக்கையில்லா பிரேரணையை பிடித்துக்கொண்டு கூச்சலிடுவதாக அவரை மேற்கோள்காட்டி சிங்கள ஊடகமொன்று செய்தி வெளியிட்டுள்ளது.

எதிர்க்கட்சிக்கு நம்பிக்கையில்லா விட்டாலும் அரசாங்கம் மிகவும் நம்பிக்கையுடனே செயற்படுகின்றது.

எதிர்க்கட்சியினால் சமர்ப்பிக்கப்பட்ட நம்பிக்கையில்லா பிரேரணை தற்போதே தோல்வியடைந்துள்ளது.

நாடாளுமன்றில் உள்ள 225உறுப்பினர்களில் 112 பேர் மாத்திரமே கையொப்பமிட்டுள்ளனர்.

அதற்கமைய பெரும்பான்மை இன்னமும் அரசாங்கத்திடமே உள்ளது.

அத்துடன் ஜனாதிபதியின் ஆதரவும் பிரதமருக்கு கிடைப்பதனால் எதிர்க்கட்சியின் நம்பிக்கையில்லா பிரேரணை பயனற்றதென அமைச்சர் ஜோன் அமரதுங்க மேலும் குறிப்பிட்டுள்ளார்.

இன்னும் 5 நாட்களில் வரவுள்ள பிரேரணை

பிரதமர் ரணில் விக்கிரமசிங்கவுக்கு எதிரான நம்பிக்கையில்லா பிரேரணை, எதிர்வரும் 5 நாட்களுக்குள் நாடாளுமன்ற ஒழுங்குபத்திரத்தில் உள்ளடக்கப்படும் என்று பிரதி சபாநாயகர் சந்திம வீரக்கொடி தெரிவித்தார்.

பிரதமர் ரணில் விக்ரமசிங்கவிற்கு எதிரான நம்பிக்கையில்லா பிரேரணை பாராளுமன்ற செயலாளர் நாயகம் தம்மிக தஸநாயக்கவிடம் நேற்று கையளிக்கப்பட்டது.

இது தொடர்பில் கருத்து தெரிவித்த போதே பிரதி சபாநாயகர் இவ்வாறு தெரிவித்துள்ளார்.

ரணிலுக்கு எதிரான நம்பிக்கையில்லா பிரேரணையில் சுமார் 112 நாடாளுமன்ற உறுப்பினர்கள் கைச்சாத்திட்டிருந்தமை குறிப்பிடத்தக்கது.