யுத்தக் குற்றச்சாட்டுக்கள் தொடர்பான விசாரணையில் புதிய அரசில் நம்பிக்கை இல்லை: பிரட் அடம்ஸ்

இலங்கையில் இடம்பெற்றதாக கூறப்படும் போர்க்குற்றச்சாட்டுக்கள் குறித்து புதிய அரசாங்கம் தீவிர விசாரணைகளை மேற்கொள்ளும் என்று தமக்கு நம்பிக்கையில்லை என மனித உரிமை கண்காணிப்பகத்தின் ஆசிய பசுபிக்கிற்கான இயக்குநர் பிரட் அடம்ஸ் தெரிவித்துள்ளார்.

அவர் அண்மையில் சர்வதேச ஊடகமொன்றுக்கு வழங்கிய செவ்வியிலேயே இவ்வாறு தெரிவித்துள்ளார்.

இறுதிக்கட்ட யுத்தத்தின் போது இராணுவத்தினருக்கு தலைமை தாங்கிய முப்படைகளின் முன்னாள் பிரதானி சரத்பொன்சேகா அரசுடன் இணைந்துள்ளமையினால் உள்நாட்டில் மேற்கொள்ளப்படும் விசாரணைகள் அரசியல் மயப்படுத்தப்படலாம் என சந்தேகம் வெளியிட்டுள்ளார்.

மேலும் இலங்கையில் எதிர்வரும் ஏப்ரல் மாதம் பாராளுமன்ற தேர்தல் நடத்தப்படவுள்ளமையினால் யுத்த குற்ற விசாரணைகள் உள்நாட்டு அரசியல் சர்ச்சைகளில் சிக்கிக்கொள்ளலாம் என எனவும், தற்போதைய நடைமுறையின் மையமாக ஐ.நா சபையே செயற்பட வேண்டும் எனவும், இது குறித்து இலங்கையின் வெளிவிவகார அமைச்சர் மங்கள சமரவீரவுடன் கலந்துரையாடுவதற்கு தாம் எதிர்பார்த்துள்ளதாகவும் மனித உரிமை கண்காணிப்பகத்தின் ஆசிய பசுபிக்கிற்கான இயக்குநர் பிரட் அடம்ஸ் தெரிவித்துள்ளார்.