அமெரிக்காவில் இருந்து ஒபாமா மட்டுமே இன்னும் வரவில்லை! டளஸ் அழகபெரும எம்.பி

பங்கு பரிவர்தனை ஆணைக்குழுவின் முன்னாள் தலைவர் கலாநிதி நாலக கொடஹேவா, கடந்த மூன்று வாரத்திற்குள் பொலிஸ்மா அதிபருக்கு செய்த முறைப்பாடு மற்றும் கூட்டு எதிர்க்கட்சியின் இரண்டு செயலமர்வுகளில் கலந்து கொண்டதன் காரணமாவே கைது செய்யப்பட்டுள்ளார் என நாடாளுமன்ற உறுப்பினர் டளஸ் அழகபெரும தெரிவித்துள்ளார்.
கூட்டு எதிர்க்கட்சிகள் கொழும்பில் இன்று நடத்திய ஊடகவியலாளர் சந்திப்பில் கலந்துகொண்டு கருத்து தெரிவிக்கும் போதே அவர் இதனை கூறியுள்ளார்.

தற்போதைய அரசாங்கம் பதவியேற்றதன் பின்னர் இதுவரை சில அமெரிக்க பிரதிநிதிகள் இலங்கை வந்துள்ளனர். அந்த நாட்டின் ஜனாதிபதியான பராக் ஒபாமா மாத்திரமே இதுவரை வரவில்லை.

இலங்கைக்கு வருவது போல் அமெரிக்க பிரதிநிதிகள் இவ்வாறு வேறு எந்த நாடுகளும் பயணம் மேற்கொள்வதில்லை. தற்போது கூட அமெரிக்க பிரதிநிதி ஒருவர் இலங்கையில் இருக்கின்றார். இம்முறை அமெரிக்காவின் வரவு செலவுத்திட்டம் தயாரிக்கப்பட்டுள்ளது.
மேலும் கூட்டு எதிர்க்கட்சியின் உறுப்பினர்கள் நாடாளுமன்றத்தில் உரையாற்ற வழங்கப்பட்டுள்ள நேரம் குறைக்கப்பட்டுள்ளது.

இந்த நிலையில், ஐக்கிய தேசியக் கட்சியின் அரசாங்கத்தை விரட்டியடித்து விட்டு ஐக்கிய மக்கள் சுதந்திர முன்னணியின் அரசாங்கம் ஒன்றை ஏற்படுத்த அவசியமாயின் எதிர்வரும் 19ஆம் திகதி வரவு செலவுத் திட்டத்திற்கு எதிராக வாக்களிக்குமாறும் நாடாளுமன்ற உறுப்பினர் டளஸ் அழகபெரும குறிப்பிட்டுள்ளார்.